Osteopatiaren jatorria

Osteopatia Andrew Taylor Still mediku iparramerikarrak (1828-1917) garatu zuen XIX. mendearen amaieran. Medikuntza arruntaren oinarrizko jakintzatik abiatuta (batik bat anatomian eta fisiologian), ikerketaren bitartez, osteopatia metodoa garatu zuen eta 1874. urtean aplikatu zuen lehen aldiz. 1892. urtean munduko lehen osteopatia-eskola sortu zuen Kirksville-Missourin: “The American School of Osteopathy”. Eskola hori egun martxan da.

Stillekin batera agertzen da, bai kontzeptuari dagokionez eta bai osteopatiaren garapenari dagokionez, William Garner Shutherland (1873-1954), osteopatian gako izango dena. Shutherland (Stillen susmotik abiatuta) jabetu zen garezurreko hezurren artean mugimendu pasiboa dagoela, eta mugimendu horrek gorputzeko beste atalen mugimenduarekin aldiberekotasuna duela. Mugimendu horri Garezurreko Bulkada Erritmikoa (GBE) deritzo, eta hortik abiatuta definitu zuen Oinarrizko Arnasketa-Mugimendua (OAM).